BBC News Hausa 2019: An sanya ranar zaben shugaban kasar Nigeria

Hukumar zaben Najeriya (INEC) ta sanya ranar da za a yi zaben shugaban kasa na shekarar 2019, inda za a yi zaben nan da kwana 433 masu zuwa.

Shugaban Hukumar Farfesa Mahmood Yakubu ya ce, a ranar 16 ga watan Fabrairun 2019 ne za a yi zaben shugaban kasar da 'yan majalisar tarayya.

Yayin da ranar 2 ga watan Maris na shekarar 2019 za a yi zaben gwamnoni da 'yan majalisar jiha, da kuma zaben shugabannin kananan hukumomin babban birnin Najeriya Abuja.

Yakubu ya bayar da sanarwar ne ranar Juma'a a wani taro da huhumar ta gabatar a Uyo, babban birnin jihar Akwa Ibom.

• Da ni INEC ne da sai na rushe jam'iyyar APC- Buba Galadima
• Ko wane irin aiki ne ke gaban INEC ?
• Fursunoni za su yi zabe a 2019

"Duk wadanda suka halartaci taron nan ya kamata su san cewa daga yau (Juma'a) saura kwana 434 a gudanar da babban zaben shekarar 2019, wato ranar 16 ga watan Fabrairu inda za a fara da zaben shugaban kasa da na majalisar tarayya," in ji shi.

Ya kara da cewa, sababbin masu kada kuri'a kimanin 3,630,529 aka yi rijista, kuma za a ci gaba da yin rijistar har zuwa kwana 60 kafin babban zaben.

A kalla jam'iyyu 67 ne suka nuna sha'awarsu ta shiga zaben, har ila yau hukumar ta karbi takardar masu neman yin rijista fiye da 120 daga kungiyoyin siyasa da suke neman a yi musu rijista a matsayin jam'iyya.